മനാമ: ( gcc.truevisionnews.com ) ബഹ്റൈനിലെ ജനവാസ മേഖലകളിൽ രാത്രി വൈകിയും അവധി ദിനങ്ങളിലും തുടരുന്ന നിർമ്മാണ-പൊളിക്കൽ പ്രവൃത്തികൾക്ക് കടുത്ത നിയന്ത്രണം ഏർപ്പെടുത്തുന്നു. ഇതുസംബന്ധിച്ച് മുനിസിപ്പാലിറ്റി കാര്യ കാർഷിക മന്ത്രി വഈൽ അൽ മുബാറക് അടിയന്തര ഉത്തരവ് പുറപ്പെടുവിക്കണമെന്ന നിർദ്ദേശം നോർത്തേൺ മുനിസിപ്പൽ കൗൺസിൽ ഐക്യകണ്ഠേന പാസാക്കി.
രാത്രികാലങ്ങളിലും പൊതു അവധി ദിനങ്ങളിലും വലിയ യന്ത്രങ്ങൾ ഉപയോഗിച്ച് നടത്തുന്ന നിർമ്മാണ പ്രവർത്തനങ്ങൾ തങ്ങളുടെ ഉറക്കം കെടുത്തുന്നതായും സമാധാനപരമായ ജീവിതത്തിന് തടസ്സമാകുന്നതായും നിരവധി താമസക്കാർ പരാതിപ്പെട്ടിരുന്നു. നിലവിലെ 1977-ലെ കെട്ടിട നിർമ്മാണ നിയന്ത്രണ നിയമത്തിൽ ഇത്തരം പ്രവൃത്തികളുടെ സമയം സംബന്ധിച്ച് വ്യക്തമായ വ്യവസ്ഥകളില്ലാത്തത് വലിയൊരു പരിമിതിയായിരുന്നു. ഈ പശ്ചാത്തലത്തിലാണ് ജനങ്ങളുടെ സ്വൈര്യജീവിതം ഉറപ്പാക്കാൻ പുതിയ നിയമ നിർമ്മാണത്തിനൊരുങ്ങുന്നത്. പുതിയ ഉത്തരവ് വരുന്നതോടെ രാത്രികാലങ്ങളിൽ ജനങ്ങൾക്ക് ബുദ്ധിമുട്ടുണ്ടാക്കുന്ന ശബ്ദമലിനീകരണത്തിന് അറുതിയാകുമെന്നാണ് പ്രതീക്ഷിക്കുന്നത്.
ഇത് മുതലെടുത്താണ് പല കരാറുകാരും രാത്രിയും പകലുമില്ലാതെ ജോലി തുടരുന്നത്. നിയമഭേദഗതികൾക്കായി കാത്തുനിൽക്കാതെ, പൊതുജനങ്ങളുടെ ബുദ്ധിമുട്ട് പരിഗണിച്ച് മന്ത്രി നേരിട്ട് ഒരു പ്രമേയം വഴി പ്രവൃത്തി സമയം ക്രമീകരിക്കണമെന്നാണ് കൗൺസിലർ അബ്ദുല്ല ആശൂർ ആവശ്യപ്പെട്ടത്. ശുപാർശ ഇപ്പോൾ മന്ത്രിയുടെ പരിഗണനക്കായി സമർപ്പിച്ചിരിക്കുകയാണ്. മന്ത്രി ഇതിൽ അനുകൂലമായ തീരുമാനമെടുത്താൽ വരും ദിവസങ്ങളിൽ തന്നെ ബഹ്റൈനിലെ നിർമ്മാണ മേഖലയിൽ പുതിയ സമയക്രമം പ്രാബല്യത്തിൽ വരും
Bahrain to crack down on night-time construction; tightens controls in residential areas
