കുവൈത്ത് : (gcc.truevisionnews.com) കുവൈത്തിലെ മുബാറക് അൽ-കബീർ ഗവർണറേറ്റിൽ പബ്ലിക് ഫുഡ് അതോറിറ്റി നടത്തിയ പരിശോധനയിൽ 10 ടണ്ണിലധികം കേടായ ഭക്ഷണം പിടിച്ചെടുത്ത് നശിപ്പിച്ചു. നിയമലംഘനം കണ്ടെത്തിയ ഒരു ഫാക്ടറി അധികൃതർ ഉടനടി അടച്ചുപൂട്ടി.
മനുഷ്യോപയോഗത്തിന് അയോഗ്യമായതും കാലാവധി കഴിഞ്ഞതുമായ 10,071 കിലോ പച്ചക്കറികളാണ് റെയ്ഡിൽ കണ്ടെത്തിയത്. ഇവ സ്ഥലത്തുതന്നെ നശിപ്പിച്ചു. പഴകിയ ഭക്ഷണം വിൽക്കൽ, ശുചിത്വമില്ലായ്മ, ലൈസൻസില്ലാതെ പ്രവർത്തിക്കൽ, ആരോഗ്യ സർട്ടിഫിക്കറ്റ് ഇല്ലാത്ത തൊഴിലാളികളെ നിയമിക്കൽ തുടങ്ങിയ ഗൗരവകരമായ ആറ് ലംഘനങ്ങൾക്കാണ് കേസെടുത്തത്.
പൊതുജനാരോഗ്യം മുൻനിർത്തി രാജ്യത്തുടനീളം വരും ദിവസങ്ങളിലും പരിശോധന കർശനമാക്കുമെന്ന് അതോറിറ്റി അറിയിച്ചു. ഭക്ഷ്യസുരക്ഷാ ചട്ടങ്ങൾ ലംഘിക്കുന്നവർക്കെതിരെ വിട്ടുവീഴ്ചയില്ലാത്ത നടപടിയുണ്ടാകും. ഉപഭോക്താക്കളുടെ സുരക്ഷ ഉറപ്പാക്കുന്നതിനായി അതോറിറ്റി നടത്തുന്ന നിരന്തര പരിശോധനകളുടെ ഭാഗമായാണ് ഈ നടപടി.
10 tons of spoiled food destroyed in Kuwait; factory shut down
