ദുബായ്: (gcc.truevisionnews.com) ദുബായിലെ ഉൾറോഡുകളുടെ വികസനപദ്ധതികളിൽ രണ്ടെണ്ണം പൂർത്തിയായി. നഗരത്തിലെ പ്രധാന റെസിഡൻഷ്യൽ, വ്യാവസായിക മേഖലകളിലെ ഗതാഗതം മെച്ചപ്പെടുത്തുന്നതിന്റെ ഭാഗമായി പ്രഖ്യാപിച്ച 103 കിലോമീറ്റർ റോഡ് വികസന പദ്ധതിയുടെ ഭാഗമാണിത്. അൽ ഖവാനീജ് 2, ജബൽ അലി വ്യവസായ മേഖല 1 എന്നിവിടങ്ങളിലെ റോഡുകളാണ് പൂർത്തിയായതെന്ന് ദുബായ് റോഡ് ഗതാഗത അതോറിറ്റി (ആർ.ടി.എ) അറിയിച്ചു.
എട്ട് റെസിഡൻഷ്യൽ, വ്യാവസായിക മേഖലകളെ ബന്ധിപ്പിക്കുന്നതാണ് ഈ റോഡുകൾ. നാദൽ ശിബ 1, 3, 4, അൽ അവിർ 1, വാദി അൽ അമാർദി, അൽ വർഖ തുടങ്ങിയ പ്രദേശങ്ങളിലെ നിർമ്മാണം അതിവേഗം പുരോഗമിക്കുകയാണെന്നും അധികൃതർ വ്യക്തമാക്കി.
അൽ ഖവാനീജ് 2ൽ അമ്മാൻ സ്ട്രീറ്റുമായും സമീപ പ്രദേശങ്ങളുമായും ബന്ധിപ്പിച്ച് ആറ് കിലോമീറ്റർ നീളത്തിലാണ് ഉൾറോഡുകൾ നിർമിച്ചിരിക്കുന്നത്. ഇതുകൂടാതെ റോഡരികിലായി 765 പാർക്കിങ് സ്ഥലങ്ങൾ, 178 വൈദ്യുതി തൂണുകൾ, സൈക്ലിങ് ട്രാക് എന്നിവയും പദ്ധതിയിൽ ഉൾപ്പെടും. 27 കിലോമീറ്റർ നീളത്തിലാണ് ജബൽ അലി വ്യവസായ മേഖല ഒന്നിൽ നടത്തിയ റോഡ് വികസനം. ഫസ്റ്റ് അൽ ഖലീൽ സ്ട്രീറ്റ്, സ്ട്രീറ്റ് 23 എന്നീ റൗണ്ട് എബൗട്ടുകളെ സിഗ്നലുകളോടു കൂടി ജങ്ഷനുകളാക്കി മാറ്റുക, അധികമായി ഏഴ് റൗണ്ട്എബൗട്ടുകളുടെ വികസനം, 42 കിലോമീറ്റർ റോഡുകളിൽ ലൈറ്റിങ് സംവിധാനങ്ങൾ ഒരുക്കൽ എന്നിവയും പദ്ധതിയിൽ ഉൾപ്പെടും. വികസനം പൂർത്തിയാകുന്നതോടെ ഇടറോഡുകൾക്ക് മണിക്കൂറിൽ ഉൾക്കൊള്ളാവുന്ന വാഹനങ്ങളുടെ ശേഷി 3,000 ആയി ഉയരും. കൂടാതെ വ്യവസായ ഹബുകളിൽ ഹെവി വാഹനങ്ങളുടെ ഗതാഗതം ഇതുവഴി സുഗമമാകുകയും ചെയ്യും.
നഗര വികസനത്തിനും ജനസംഖ്യ വളർച്ചക്കും അനുസരിച്ചുള്ള ആവശ്യങ്ങൾ നിറവേറ്റുന്നതിനും ജീവിത നിലവാരം മെച്ചപ്പെടുത്തുന്നതിനും താമസക്കാരുടെ സാമൂഹിക ക്ഷേമവും സന്തോഷവും വർധിപ്പിക്കുന്നതിനുമായി അടിസ്ഥാന സൗകര്യങ്ങൾ വികസിപ്പിക്കുകയെന്ന ഭരണനേതൃത്വത്തിന്‍റെ നിർദേശങ്ങൾക്ക് കീഴിലാണ് ഉൾറോഡുകളുടെ നിർമാണം നടക്കുന്നതെന്ന് ആർ.ടി.എ എക്സിക്യൂട്ടിവ് ബോർഡ് ചെയർമാനും ഡയറക്ടർ ജനറലുമായ മതാർ അൽ തായർ പറഞ്ഞു.
Traveling is now easier; 103 km of internal roads become a reality in Dubai
.jpg)
.jpg)