ബഹ്‌റൈനിൽ വീടുകളിലും കാറുകളിലും വ്യാപകമായി ഒട്ടിക്കുന്ന ആ നമ്പറുകളിൽ വിളിക്കരുത്! വൻ തട്ടിപ്പ് സംഘത്തിനെതിരെ മുന്നറിയിപ്പ്

മനാമ: (https://gcc.truevisionnews.com/)  ബഹ്‌റൈനിൽ വീടുകളുടെ ഗേറ്റുകളിലും വാഹനങ്ങളുടെ ചില്ലുകളിലും വ്യാപകമായി പതിക്കുന്ന വ്യാജ മെയിന്റനൻസ് പരസ്യങ്ങൾക്കും സ്റ്റിക്കറുകൾക്കുമെതിരെ കർശന നടപടിയുമായി വടക്കൻ മുനിസിപ്പൽ കൗൺസിൽ. വ്യാജ ഫോൺ നമ്പറുകളും രജിസ്റ്റർ ചെയ്യാത്ത അനധികൃത സ്ഥാപനങ്ങളും കേന്ദ്രീകരിച്ച് നടക്കുന്ന വലിയ തട്ടിപ്പുകൾ തടയാൻ അടിയന്തര തദ്ദേശീയ പരിശോധന വേണമെന്ന് നാല് കൗൺസിൽ അംഗങ്ങൾ ആവശ്യപ്പെട്ടു.

ഹമദ് ടൗൺ കൗൺസിലർ അബ്ദുല്ല അൽ ഖുബൈസിയുടെ നേതൃത്വത്തിലാണ് ഈ സുപ്രധാന കാമ്പെയ്ൻ ആരംഭിച്ചിരിക്കുന്നത്. വീടുകളുടെ വാതിലുകൾ, കാറുകളുടെ വിൻഡ്‌ഷീൽഡുകൾ, ഇലക്ട്രിസിറ്റി സബ്‌സ്റ്റേഷനുകൾ എന്നിവിടങ്ങളിൽ നോട്ടീസുകളും സ്റ്റിക്കറുകളും തോന്നിയപടി ഒട്ടിക്കുന്നത് ജനവാസ മേഖലകളുടെ ഭംഗി കെടുത്തുന്നതിനൊപ്പം വലിയ സുരക്ഷാ ഭീഷണിയും ഉണ്ടാക്കുന്നതായി അദ്ദേഹം വ്യക്തമാക്കി.

എയർകണ്ടീഷണർ, ജനറൽ മെയിന്റനൻസ് സേവനങ്ങൾ വാഗ്ദാനം ചെയ്ത് വ്യാപകമായി വിതരണം ചെയ്യുന്ന ഇത്തരം വ്യാജ സംഘങ്ങൾക്കെതിരെ ശക്തമായ നിയമനടപടി സ്വീകരിക്കാൻ മുനിസിപ്പാലിറ്റി, കാർഷിക കാര്യ മന്ത്രാലയവും വ്യവസായ-വാണിജ്യ മന്ത്രാലയവും സംയുക്തമായി രംഗത്തിറങ്ങണമെന്ന് കൗൺസിലർമാർ ആവശ്യപ്പെട്ടു.

പരസ്യങ്ങളിൽ കാണുന്ന അപരിചിതമായ നമ്പറുകളിൽ ബന്ധപ്പെടരുതെന്ന് അധികൃതർ പൊതുജനങ്ങൾക്ക് മുന്നറിയിപ്പ് നൽകി. പൊതുസ്ഥലങ്ങളിലും സ്വകാര്യ സ്വത്തുക്കളിലും പതിച്ചിട്ടുള്ള സ്റ്റിക്കറുകൾ ഉടൻ നീക്കം ചെയ്യാനും തട്ടിപ്പുകാർക്കെതിരെ നടപടി ശക്തമാക്കാനുമാണ് അധികൃതരുടെ തീരുമാനം.

Also read: ഓണത്തിന് പ്രവാസികൾക്ക് കോളടിക്കും ! ഗൾഫ് കറൻസികളുടെ വിനിമയ നിരക്ക് വീണ്ടുമുയർന്നു

Content Highlight: Bahrain Council Demands Crackdown on Fake Maintenance Ads and Stickers

#Bahrain News #Fake Ads #Maintenance Scam #Hamad Town #Municipal Council