മസ്കത്ത്: ( gcc.truevisionnews.com ) തെക്കൻ ബാത്തിന മുനിസിപ്പാലിറ്റി അധികൃതർ നടത്തിയ പരിശോധനയിൽ മുസന്നയിൽ നിയമവിരുദ്ധമായി പ്രവർത്തിച്ചിരുന്ന ഭക്ഷ്യനിർമ്മാണ കേന്ദ്രം കണ്ടെത്തി പൂട്ടിച്ചു. ഒരു സ്വകാര്യ വസതി കേന്ദ്രീകരിച്ച് തികച്ചും അശാസ്ത്രീയമായ സാഹചര്യത്തിൽ പ്രവർത്തിച്ചിരുന്ന സമോസ നിർമ്മാണ കേന്ദ്രത്തിന് നേരെയാണ് നടപടിയുണ്ടായത്.
പബ്ലിക് പ്രോസിക്യൂഷൻ, റോയൽ ഒമാൻ പൊലീസ് എന്നിവരുമായി സഹകരിച്ച് മുസന്ന മുനിസിപ്പാലിറ്റി വിഭാഗമാണ് റെയ്ഡ് നടത്തിയത്. ലൈസൻസില്ലാതെയും ആരോഗ്യ മാനദണ്ഡങ്ങൾ പാലിക്കാതെയും പ്രവർത്തിച്ച ഈ സ്ഥാപനത്തിലെ ഉപകരണങ്ങളും ഭക്ഷ്യവസ്തുക്കളും അധികൃതർ പിടിച്ചെടുത്തു.
മതിയായ വ്യാപാര ലൈസൻസുകളില്ലാതെയും ദേശീയ ആരോഗ്യ മാനദണ്ഡങ്ങൾ പാലിക്കാതെയും വൻതോതിൽ സമൂസ നിർമിച്ചിരുന്നതായി പരിശോധനയിൽ കണ്ടെത്തി. വൃത്തിഹീനമായ സാഹചര്യങ്ങളിലായിരുന്നു ഇതിന്റെ പ്രവർത്തനം. റെയ്ഡിൽ 903 കിലോഗ്രാം ഭക്ഷ്യവസ്തുക്കൾ പിടിച്ചെടുത്ത് നശിപ്പിച്ചതായി മുനിസിപ്പാലിറ്റി അറിയിച്ചു. ബന്ധപ്പെട്ടവർക്കെതിരെ ആവശ്യമായ നിയമ നടപടികൾ സ്വീകരിച്ചതായും അധികൃതർ വ്യക്തമാക്കി.
Massive raid in Musanna; Samosa manufacturing facility operating from home shut down, 903 kg of food items destroyed.
