ഒരു സെക്കന്റ് വൈകിയിരുന്നെങ്കിൽ...! സിഗ്നൽ ലംഘിച്ച് ചീറിപ്പാഞ്ഞ് കാർ; ദുബായിൽ കുഞ്ഞ് രക്ഷപ്പെട്ടത് തലനാരിഴയ്ക്ക്

ദുബൈ: ( https://gcc.truevisionnews.com/ ) റെഡ് സിഗ്നൽ മറികടന്ന് അമിതവേഗതയിൽ പാഞ്ഞ കാറിന് മുന്നിൽനിന്ന് പിഞ്ചുകുഞ്ഞ് രക്ഷപ്പെട്ടത് തലനാരിഴയ്ക്ക്. സീബ്ര ലൈനിലൂടെ സ്ട്രോളറുമായി (കുട്ടിവണ്ടി) റോഡ് മുറിച്ചുകടക്കുകയായിരുന്നു യുവതി. തൊട്ടുപിറകിലായി മറ്റൊരു കുട്ടി ഇ-സ്കൂട്ടറിലും ഉണ്ടായിരുന്നു.

ഈ സമയം ചുവന്ന ലൈറ്റ്​ കത്തിയിരുന്നെങ്കിലും കാർ അമിത വേഗതയിൽ കുഞ്ഞിന്‍റെ തൊട്ടരികിലൂടെ കടന്നുപോകുകയായിരുന്നു. ഭാഗ്യം കൊണ്ടു മാത്രമാണ്​ അപകടം ഒഴിവായത്​.

ദുബൈ പൊലീസ്​ എക്സിൽ പുറത്തുവിട്ട വീഡിയോ ദൃശ്യങ്ങൾ നെഞ്ചിടിപ്പോടെ അല്ലാതെ കണാനാവില്ല. വീഡിയോ നിമിഷ നേരം കൊണ്ട്​ സോഷ്യൽ മീഡിയയിൽ വൈറലാവുകയും ചെയ്തു. റെഡ്​ സിഗ്​നൽ മറികടന്നത്​ കൂടാതെ സീബ്ര ലൈനിൽ കാൽനട യാത്രക്കാർക്ക്​ മുൻഗണന നൽകണമെന്ന നിയമവും ഡ്രൈവർ പാലിച്ചിരുന്നില്ലെന്ന്​ ദുബൈ പൊലീസ്​ അറിയിച്ചു. ദുബൈയിൽ റെഡ്​ സിഗ്​നൽ മറികടന്നാൽ 1000 ദിർഹം പിഴയും 12 ബ്ലാക്ക്​ പോയിന്‍റുമാണ്​ ശിക്ഷ. കൂടാതെ വാഹനം ഒരു മാസത്തേക്ക്​ പിടിച്ചെടുക്കുകയും ചെയ്യും. സീബ്ര ലൈനിൽ കാൽനടക്കാർക്ക്​ മുൻഗണന നൽകിയില്ലെങ്കിൽ 500 ദിർഹം പിഴയും ആറ്​ ബ്ലാക്ക്​ പോയിന്‍റുമാണ്​ ശിക്ഷയെന്നും ദുബൈ പൊലീസ്​ ഓർമിപ്പിച്ചു.

Content Highlight: Baby barely escapes after car runs through traffic light in Dubai