കുവൈത്ത് സിറ്റി: (https://gcc.truevisionnews.com/) ഭാഷകൾക്കും ജാതികൾക്കും അതിർത്തികൾക്കും അതീതമായി മനുഷ്യരെ ഒന്നിപ്പിക്കുന്ന കായികഭാഷയാണ് ഫുട്ബോൾ. ഫലസ്തീനിലെ ദുരിത ജീവിതം നയിക്കുന്ന കുഞ്ഞുങ്ങളുടെ മുഖത്ത് ചിരി വീണ്ടെടുക്കാൻ കുവൈത്ത് മുഴുവൻ പന്തുതട്ടിയപ്പോൾ, അതൊരു വൈകാരിക നിമിഷമായിരുന്നു.
കുവൈത്തും ഐക്യരാഷ്ട്രസഭയും ചേർന്ന് രണ്ടു ദിവസങ്ങളിലായി സംഘടിപ്പിച്ച 'ഫുട്ബാൾ ഫോർ ഹ്യൂമാനിറ്റി' എന്ന പ്രത്യേക ഫുട്ബാൾ മേള, കായിക വിനോദത്തിനപ്പുറം കരുണയുടെ വേദിയായി മാറി.
സുലൈബിഖാത്തിലെ ജാബിർ അൽ മുബാറക് സ്റ്റേഡിയത്തിൽ നടന്ന ഈ മേളയിൽ എട്ട് മുതൽ പന്ത്രണ്ട് വയസ്സ് വരെയുള്ള 400ലധികം കുട്ടികൾ പങ്കെടുത്തു. അവർ ഓരോരുത്തരും പന്ത് തട്ടിയത് ഫലസ്തീനിലെ സഹോദരങ്ങളോടുള്ള സ്നേഹത്തിൻ്റെയും കരുതലിൻ്റെയും പ്രതീകമായിരുന്നു.
മത്സരങ്ങൾക്കൊപ്പം "അൽ ഹംറ ഷോപ്പിങ് സെൻ്ററിൽ" ഫുട്ബാളുമായി ബന്ധപ്പെട്ട അനവധി ഇനങ്ങളുടെ പ്രദർശനവും ചാരിറ്റി ലേലവും സംഘടിപ്പിച്ചു. അതിൽനിന്ന് ലഭിക്കുന്ന മുഴുവൻ വരുമാനവും കുവൈത്ത് റെഡ് ക്രസന്റ് സൊസൈറ്റി വഴി ഫലസ്തീനിലെ കുട്ടികൾക്ക് ആവശ്യമായ ഭക്ഷണം, മരുന്ന്, വിദ്യാഭ്യാസ സഹായങ്ങൾ തുടങ്ങിയവയ്ക്കായി കൈമാറും.
മേളയ്ക്ക് കൂടുതൽ ഊർജം നൽകിയത് കുവൈത്ത് വിദേശകാര്യ മന്ത്രാലയം, ഐക്യരാഷ്ട്രസഭ, യുനെസ്കോ, ലോകാരോഗ്യ സംഘടന, യുനിസെഫ് തുടങ്ങിയ അന്താരാഷ്ട്ര സംഘടനകളുടെ സാന്നിധ്യമായിരുന്നു.
കൂടാതെ കുവൈത്ത് ഫുട്ബാൾ അസോസിയേഷനും ഫിഫയുടെ ടാലന്റ് ഡെവലപ്മെൻറ് പ്രോഗ്രാമും, 11 രാജ്യങ്ങളുടെ എംബസികളും സ്വകാര്യ സ്ഥാപനങ്ങളും ചേർന്ന് ഈ മനോഹര വേദിയെ വിജയകരമാക്കി മാറ്റി.
മേളയുടെ ഭാഗമായി കുട്ടികൾക്കായി കലാപരിപാടികൾ, കായികപ്രദർശനങ്ങൾ തുടങ്ങി നിരവധി സാംസ്കാരിക പരിപാടികളും അരങ്ങേറി. സമൂഹത്തിന്റെ എല്ലാ തലങ്ങളെയും ഒന്നിപ്പിച്ച ഈ വേദി, കായികം വെറും വിനോദമല്ല, മനുഷ്യഹൃദയങ്ങളെ ബന്ധിപ്പിക്കുന്ന ഒന്നാണ് എന്ന് തെളിയിച്ചു.
"കുവൈത്ത് തന്റെ ഹൃദയത്തിന്റെ കൈകൾ തുറന്നിരിക്കുന്നു; ഈ കുട്ടികൾ മാത്രമല്ല, ഈ മനുഷ്യസ്നേഹവും നമ്മുടെ ഭാവിയുടെ പ്രതീക്ഷയാണ്"
സംരംഭത്തിന്റെ വിജയത്തെ വിദേശകാര്യ സഹമന്ത്രി അംബാസഡർ അബ്ദുൽ അസീസ് അൽ ജറല്ല പ്രശംസിചുകൊണ്ട് പറഞ്ഞു.
Palestine, United Nations, Kuwait, Football, Football for Humanity
