ഫുജൈറ: ( gcc.truevisionnews.com ) മധ്യേഷ്യയിലെ യുദ്ധഭീതി ശമിക്കുകയും ആകാശപാതകൾ പൂർണ്ണമായും തുറക്കപ്പെടുകയും ചെയ്ത സാഹചര്യത്തിൽ ഗൾഫ് രാജ്യങ്ങൾ സാധാരണ നിലയിലേക്ക് മടങ്ങിക്കൊണ്ടിരിക്കുകയാണ്. ഇതോടെ നാട്ടിലേക്കും നാട്ടിൽ നിന്ന് മടങ്ങിയുമുള്ള യാത്രകൾക്കായി പ്രവാസികൾ പ്രതീക്ഷയോടെ കാത്തിരിക്കുകയാണ്. എന്നാൽ, ഈ ആശ്വാസകരമായ സാഹചര്യത്തിലും വിമാന ടിക്കറ്റ് നിരക്കുകൾ കുത്തനെ ഉയർന്ന നിലയിൽ തുടരുന്നത് പ്രവാസികളെ ഗുരുതരമായ സാമ്പത്തിക സമ്മർദ്ദത്തിലാഴ്ത്തുന്നു എന്ന് ഫുജൈറയിലെ പ്രവാസിയായ യു.കെ. റാഷിദ് ജാതിയേരി പറയുന്നു.
ഗൾഫ് നാടുകളിൽ വേനൽ അവധിക്കാലം ആരംഭിക്കാനിരിക്കെ കുടുംബസമേതം നാട്ടിലേക്കുള്ള യാത്രയ്ക്കായി കാത്തിരിക്കുന്നവരുടെ എണ്ണം വർധിച്ചിരിക്കുകയാണ്. വർഷം മുഴുവൻ ജോലിയുടെ തിരക്കിനിടയിൽ കുടുംബത്തോടൊപ്പം സമയം ചിലവഴിക്കാനുള്ള ആഗ്രഹത്തിലാണ് പലരും. എന്നാൽ, ഈ പ്രതീക്ഷകൾക്ക് വലിയ തിരിച്ചടിയായി ഉയർന്ന വിമാന ടിക്കറ്റ് നിരക്കുകൾ മാറിയിരിക്കുകയാണ് എന്ന് അദ്ദേഹം പറയുന്നു.
നോമ്പ്, പെരുന്നാൾ, വിഷു, ഈസ്റ്റർ തുടങ്ങിയ ആഘോഷകാലങ്ങളിലും നാട്ടിലേക്കു പോകാൻ കഴിയാതെ നിരവധി പ്രവാസികൾ ബുദ്ധിമുട്ടിയിരുന്നു. അതുപോലെ തന്നെ, നാട്ടിൽ നിന്നുള്ള അവധിക്കുശേഷം ജോലിസ്ഥലങ്ങളിലേക്കുള്ള മടക്കയാത്രയും ഇന്ന് വലിയ പ്രതിസന്ധിയായി തുടരുകയാണ്. നാട്ടിലേക്കു പോയവരുടെ അവധി കഴിഞ്ഞ് ജോലിസ്ഥലങ്ങളിലേക്കുള്ള തിരിച്ചുപോക്ക് വലിയ സാമ്പത്തിക ബാധ്യതയായി മാറി.
നിലവിലുള്ള “സ്പെഷ്യൽ സർവീസുകൾ” വഴി ഉയർന്ന നിരക്കുകളിൽ ലഭിക്കുന്ന ടിക്കറ്റുകൾ ചെറിയ ശമ്പളത്തിൽ ജോലി ചെയ്യുന്ന ഇടത്തരക്കാരായ പ്രവാസികൾക്ക് താങ്ങാനാകാത്ത ഭാരമാണ്. ഇന്ത്യൻ വിമാനക്കമ്പനികളുടെ കേരളത്തിലേക്കുള്ള സർവീസുകളുടെ എണ്ണം കുറഞ്ഞതും ഈ പ്രതിസന്ധി രൂക്ഷമാക്കാൻ കാരണമായിട്ടുണ്ട് എന്ന് അദ്ദേഹം പറയുന്നു. കേരളത്തിന്റെ സമ്പദ്വ്യവസ്ഥയെ താങ്ങി നിർത്തുന്ന പ്രവാസികളുടെ അടിസ്ഥാന ആവശ്യമായ വിമാനയാത്ര തന്നെ ഇന്ന് ഒരു സാമ്പത്തിക ബുദ്ധിമുട്ടായി മാറിയിരിക്കുകയാണ്.
ഉയർന്ന ടിക്കറ്റ് നിരക്കുകൾ കാരണം പലർക്കും സമയത്ത് ജോലിസ്ഥലങ്ങളിലേക്കു മടങ്ങാൻ കഴിയാത്ത അവസ്ഥയും നിലനിൽക്കുന്നു. ഇത് തൊഴിൽ നഷ്ടഭീഷണിയിലേക്ക് വരെ നയിക്കുന്ന സാഹചര്യമാണുള്ളത്. വിദേശ തൊഴിൽ മേഖലയിൽ ജോലി നഷ്ടപ്പെട്ടാൽ വീണ്ടും അവസരം നേടുന്നത് എളുപ്പമല്ലെന്ന യാഥാർത്ഥ്യം പ്രവാസികളെ കൂടുതൽ ആശങ്കയിലാഴ്ത്തുന്നു.
കുടുംബത്തിന്റെ പ്രതീക്ഷകളും ഉത്തരവാദിത്തങ്ങളും ചുമന്ന് വിദേശത്ത് കഴിയുന്ന സാധാരണ പ്രവാസിക്ക് ഈ സാഹചര്യം ഇരട്ട പ്രഹരമായി മാറിയിരിക്കുകയാണ്. അതുകൊണ്ട് തന്നെ, പ്രവാസികളുടെ യാത്രാ പ്രശ്നം ഒരു സാധാരണ സൗകര്യപ്രശ്നമല്ല. അത് അവരുടെ ജീവിതോപാധിയെയും കുടുംബങ്ങളുടെ ഭാവിയെയും നേരിട്ട് ബാധിക്കുന്ന അതീവ ഗൗരവമായ വിഷയമാണ്.
പ്രവാസികളുടെ നാട്ടിലേക്കും തിരിച്ചുമുള്ള യാത്രകൾ സുഗമവും താങ്ങാവുന്നതുമായ നിരക്കിൽ ഉറപ്പാക്കുന്നതിനായി ബന്ധപ്പെട്ട അധികാരികളുടെ സമയോചിതമായ ഇടപെടൽ അനിവാര്യമാണ്. സർക്കാരുകളും വിമാനക്കമ്പനികളും ഒരുമിച്ച് പ്രവർത്തിച്ചാൽ മാത്രമേ ഈ പ്രതിസന്ധിക്ക് ശാശ്വത പരിഹാരം കണ്ടെത്താനാകൂ. അത്തരമൊരു ഇടപെടൽ ഉണ്ടായാൽ പ്രവാസികൾക്ക് വീണ്ടും ആത്മവിശ്വാസത്തോടെ നാട്ടിലേക്കും ജോലിസ്ഥലങ്ങളിലേക്കും യാത്ര ചെയ്യാനാവുന്ന സാഹചര്യം ഉറപ്പാക്കാം എന്നും അദ്ദേഹം പറയുന്നു.
Air travel becomes burdensome for overweight expatriates
