റിയാദ്: (gcc.truevisionnews.com) രാജ്യത്തെ ഭക്ഷ്യസുരക്ഷ ഉറപ്പാക്കുന്നതിന്റെ ഭാഗമായി സൗദി ഭക്ഷ്യസുരക്ഷാ അതോറിറ്റി (GFSA) ഈ വർഷത്തെ മൂന്നാമത്തെ വലിയ ഗോതമ്പ് ഇറക്കുമതിക്കായി ടെൻഡർ ക്ഷണിച്ചു.
7.10 ലക്ഷം ടൺ ഗോതമ്പ് വിവിധ ഘട്ടങ്ങളിലായി ഇറക്കുമതി ചെയ്യാനാണ് അതോറിറ്റി ലക്ഷ്യമിടുന്നത്. ജൂൺ മുതൽ ഓഗസ്റ്റ് വരെയുള്ള മാസങ്ങളിൽ 12 കപ്പലുകളിലായി എത്തുന്ന ഗോതമ്പ് രാജ്യത്തെ പ്രധാന തുറമുഖങ്ങൾ വഴി വിതരണം ചെയ്യും.
ഇതിൽ അഞ്ച് കപ്പലുകൾ വീതം ജിദ്ദ ഇസ്ലാമിക് പോർട്ടിലും യാംബു കൊമേഴ്സ്യൽ പോർട്ടിലുമാണ് ചരക്കിറക്കുക. ബാക്കിയുള്ള രണ്ട് കപ്പലുകൾ ജിസാൻ തുറമുഖത്താണ് എത്തുക. ഭക്ഷ്യധാന്യങ്ങളുടെ കരുതൽ ശേഖരം വർധിപ്പിക്കുന്നതിലൂടെ ആഭ്യന്തര വിപണിയിലെ ആവശ്യങ്ങൾ തടസ്സമില്ലാതെ നിറവേറ്റാൻ സാധിക്കുമെന്ന് അതോറിറ്റി അധികൃതർ വ്യക്തമാക്കി.
ആഭ്യന്തര മില്ലിംഗ് കമ്പനികളുടെ പ്രവർത്തനം സുഗമമാക്കുന്നതിനും രാജ്യത്തെ ഭക്ഷ്യലഭ്യത ഏതു സാഹചര്യത്തിലും സുരക്ഷിതമായി നിലനിർത്തുന്നതിനും മുൻഗണന നൽകിയാണ് ഇത്തരം തന്ത്രപരമായ നീക്കങ്ങൾ നടത്തുന്നത്.
കൃത്യമായ പ്ലാനിംഗിലൂടെയും വിതരണ ശൃംഖലയുടെ കാര്യക്ഷമതയിലൂടെയും ഭക്ഷ്യസുരക്ഷാ മേഖലയിൽ വലിയ മുന്നേറ്റമാണ് സൗദി ലക്ഷ്യമിടുന്നത്.
Saudi Arabia to ensure food security
