#Dubai Police #UAE Job Scam #Fake Visa #Expats UAE #Be Aware of Fraud #Cyber Crime
ദുബായ്:(gcc.truevisionnews.com) ദുബായിൽ ജോലി, താമസം, സന്ദർശന വിസ എന്നിവ വാഗ്ദാനം ചെയ്ത് പണം തട്ടുന്ന ഓൺലൈൻ തട്ടിപ്പുകൾ വർധിക്കുന്ന സാഹചര്യത്തിൽ പൊതുജനങ്ങൾക്ക് ജാഗ്രതാ മുന്നറിയിപ്പുമായി ദുബായ് പൊലീസ്.
സോഷ്യൽ മീഡിയ, വാട്സ്ആപ്പ് പോലുള്ള മെസേജിംഗ് ആപ്പുകൾ, വ്യാജ വെബ്സൈറ്റുകൾ എന്നിവയിലൂടെയാണ് തട്ടിപ്പുകാർ പ്രധാനമായും ആളുകളെ വലയിലാക്കുന്നതെന്ന് ആന്റി-ഫ്രോഡ് സെന്റർ അറിയിച്ചു."വിദേശത്ത് ഉറപ്പായ ജോലി", "വേഗത്തിൽ വിസ", "സൗജന്യ താമസം" തുടങ്ങിയ ആകർഷകമായ വാഗ്ദാനങ്ങൾ നൽകിയാണ് തട്ടിപ്പുകാർ സമീപിക്കുന്നത്.
ഇതിനായി മുൻകൂറായി പ്രോസസിംഗ് ഫീസ്, സെക്യൂരിറ്റി ഡെപ്പോസിറ്റ്, വിസ ഫീസ് എന്നീ പേരുകളിൽ വലിയ തുക ആവശ്യപ്പെടുന്നതാണ് ഇവരുടെ രീതി. എന്നാൽ പണം കൈപ്പറ്റിയ ശേഷം ഇവർ ബന്ധം വിച്ഛേദിക്കുകയാണ് ചെയ്യുന്നത്.
നിയമപരമായ നടപടിക്രമങ്ങൾ പാലിക്കാതെ വിസ ലഭ്യമാക്കാമെന്നോ, യാതൊരു അഭിമുഖവും കൂടാതെ ജോലി ഉറപ്പാക്കാമെന്നോ പറയുന്ന ഏത് ഓഫറിനെയും സംശയത്തോടെ കാണണമെന്ന് ദുബായ് പൊലീസ് നിർദേശിച്ചു. യുഎഇയിലെ നിയമപ്രകാരം ഒരു കമ്പനിക്കും നേരിട്ട് പണം വാങ്ങി വിസ നൽകാൻ കഴിയില്ലെന്നും അധികൃതർ വ്യക്തമാക്കി.
ഇത്തരം തട്ടിപ്പുകൾക്കെതിരെ ജനങ്ങളെ ബോധവൽക്കരിക്കുന്നതിന്റെ ഭാഗമായി ''Be Aware of Fraud'' എന്ന പേരിൽ ഒരു ബോധവൽക്കരണ ക്യാമ്പയിനും ദുബായ് പൊലീസ് ആരംഭിച്ചിട്ടുണ്ട്. പരസ്യങ്ങളുടെയും സന്ദേശങ്ങളുടെയും ആധികാരികത പരിശോധിക്കുക എന്നതാണ് തട്ടിപ്പിൽ നിന്ന് രക്ഷപ്പെടാനുള്ള ആദ്യപടിയെന്ന് പൊലീസ് പറഞ്ഞു.
സംശയാസ്പദമായ ജോലി ഓഫറുകളോ വ്യാജ വെബ്സൈറ്റുകളോ സന്ദേശങ്ങളോ ലഭിച്ചാൽ ഉടൻ തന്നെ റിപ്പോർട്ട് ചെയ്യണമെന്നും പൊലീസ് അഭ്യർത്ഥിച്ചു. ദുബായ് പൊലീസ് ആപ്പ്, ഇ-ക്രൈം പ്ലാറ്റ്ഫോം, അല്ലെങ്കിൽ 901 എന്ന ഹെൽപ്പ് ലൈൻ നമ്പറിൽ വിളിച്ചോ വിവരങ്ങൾ നൽകാം.
യുഎഇയിൽ ജോലി തേടുന്ന ആയിരക്കണക്കിന് മലയാളികളുൾപ്പെടെയുള്ള പ്രവാസികൾക്ക് ഈ മുന്നറിയിപ്പ് ഏറെ പ്രധാനമാണ്. വ്യാജ വാഗ്ദാനങ്ങളിൽ വീണ് പണവും സമയവും നഷ്ടപ്പെടാതിരിക്കാൻ ഔദ്യോഗിക ചാനലുകൾ വഴി മാത്രം വിസ-ജോലി നടപടികൾ പൂർത്തിയാക്കണമെന്ന് പൊലീസ് ആവർത്തിച്ച് ഓർമിപ്പിച്ചു.
Content Highlight: Dubai Police Warn Against Fake Visa and Job Offer Scams Targeting Expats
#Dubai Police #UAE Job Scam #Fake Visa #Expats UAE #Be Aware of Fraud #Cyber Crime
