ദുബായ്: (gcc.truevisionnews.com) ഓഫീസ് മുറികൾക്കും വീടിനും പുറത്ത് പ്രകൃതിരമണീയമായ അന്തരീക്ഷത്തിൽ ഇരുന്ന് ജോലി ചെയ്യാൻ അവസരമൊരുക്കുന്ന 'വർക്ക് ഫ്രം പാർക്ക്' പദ്ധതിക്ക് ദുബായ് മുനിസിപ്പാലിറ്റി തുടക്കമിട്ടു.
ദുബായ് 2040 പാർക്ക് ആൻഡ് ഗ്രീനറി സ്ട്രാറ്റജിയുടെ ഭാഗമായാണ് പൊതുപാർക്കുകളെ സർഗ്ഗാത്മകമായ തൊഴിലിടങ്ങളാക്കി മാറ്റുന്ന ഈ നൂതന പദ്ധതി നടപ്പിലാക്കുന്നത്. ആധുനിക കാലത്തെ തൊഴിൽ ശൈലികൾക്ക് അനുയോജ്യമായ മാറ്റങ്ങൾ നഗരത്തിൽ കൊണ്ടുവരികയാണ് ഇതിലൂടെ ലക്ഷ്യമിടുന്നത്.
പദ്ധതിയുടെ ആദ്യഘട്ടം അടുത്ത മാസം അൽ ബർഷ പോണ്ട് പാർക്കിൽ ആരംഭിക്കും. സംരംഭകർ, ഫ്രീലാൻസർമാർ, ചെറുകിട ബിസിനസ് ഉടമകൾ എന്നിവർക്ക് ഏറെ പ്രയോജനകരമാകുന്ന രീതിയിലാണ് ഇവിടെ സൗകര്യങ്ങൾ ഒരുക്കുന്നത്.
പരിസ്ഥിതി സൗഹൃദമായ നിർമ്മാണ രീതികൾ അവലംബിച്ചാണ് തൊഴിലിടങ്ങൾ സജ്ജമാക്കുന്നത്. ഈ വർഷം തന്നെ നഗരത്തിലെ മറ്റ് പ്രധാന പാർക്കുകളിലേക്കും പദ്ധതി വ്യാപിപ്പിക്കാനാണ് അധികൃതരുടെ തീരുമാനം. ഇതിനായി ഗ്രൂപ്പ് അമാന, ലെറ്റ്സ് വർക്ക് എന്നീ സ്ഥാപനങ്ങളുമായി മുനിസിപ്പാലിറ്റി കരാർ ഒപ്പിട്ടു കഴിഞ്ഞു.
ലെറ്റ്സ് വർക്ക് പ്ലാറ്റ്ഫോം വഴി ഉപയോക്താക്കൾക്ക് ഹോട്ട് സ്പോട്ടുകൾ, പോഡ്കാസ്റ്റ് സ്റ്റുഡിയോകൾ, ക്രിയേറ്റീവ് പ്രൊഡക്ഷൻ സൗകര്യങ്ങൾ എന്നിവ ലഭ്യമാകും. കൂടാതെ, വിദ്യാഭ്യാസ പരിപാടികൾക്കും പ്രത്യേക ക്രിയേറ്റീവ് സ്പേസുകൾക്കും ഇവിടെ സൗകര്യമുണ്ടാകും.
പൊതു-സ്വകാര്യ പങ്കാളിത്തത്തോടെ നടപ്പിലാക്കുന്ന ഈ പദ്ധതി ദുബായ് ഇക്കണോമിക് അജണ്ട ഡി 33-ന് കരുത്തേകും. ജനങ്ങളുടെ ജീവിതനിലവാരം ഉയർത്തുന്നതിനൊപ്പം ഉൽപ്പാദനക്ഷമത വർദ്ധിപ്പിക്കാനും പുതിയ നിക്ഷേപ അവസരങ്ങൾ സൃഷ്ടിക്കാനും ഇതിലൂടെ സാധിക്കുമെന്ന് ദുബായ് മുനിസിപ്പാലിറ്റി പബ്ലിക് ഫെസിലിറ്റീസ് ഏജൻസി സി.ഇ.ഒ ബദർ അൻവാഹി വ്യക്തമാക്കി.
Dubai Municipality launches 'Work from Park' project
